【浩海南天】鄭浩南

鄭浩南與太太Ailyn結婚兩年，Ailyn現懷有三個月身孕，熱愛運動的鄭浩南與愛妻一星期做足六日運動，二人日前更一起打網球，十分恩愛。

鄭浩南的太太Ailyn懷有三個多月身孕，仍不忘每天做運動，二人日前一起打網球，Ailyn雖然挺著大肚子，但身手仍相當靈活，不過心思縝密的鄭浩南計好網球的落點，毋須太太兩邊走。

已為BB搵學校
鄭浩南主張孕婦多做運動，他說：「大肚婆分三個階段，過了頭三個月之後，應該開始打波，做下後腰部運動，游水、健身運動都可以做，潛水有氣壓就唔玩得，所以我呢排都冇得去潛水，之前我還在大馬考到個潛水會總教練牌。」
問Ailyn懷孕打網球有何感覺？她說：「冇乜特別，老公好就我，打波都唔使點郁，現在除了星期日老公要去打壘球之外，我每個星期都做足六日運動。」
鄭浩南表示暫時仍未知胎兒是男或女，他說：「前幾日去照超聲波，個胎係咁郁都照唔到，不過生仔生女都冇所謂啦！呢胎會在大馬生，BB出世後就在加拿大住，有我屋企人照顧，我連幼稚園同小學都搵埋，全部都安排好晒。」

產後食薑醋驅寒
打完網球之後，鄭浩南便與太太到尖沙嘴買燕窩，他說：「我唔信食補品補身呢種講法，外國人都冇食補品啦，咪一樣冇問題，我買燕窩畀太太食，咪當食糖水，反而我會信生完仔食薑醋可以驅寒，那些人重話生完一個月唔可以沖涼同洗頭，咁點得阿，嚇死人咩！」

採訪、攝影：魯萍

Ailyn：我每星期做足六日運動！

鄭浩南與懷孕三個多月的愛妻Ailyn打網球，有益身心。

Ailyn打波時活力充沛。

鄭浩南與Ailyn計劃到大馬迎接BB誕生。

鄭浩南：生仔生女都冇所謂啦！