文: 王思明

要數鄭浩南(Mark),只需「三言」,連「兩語」都慳番:「好、幾好、真係唔錯。」在馬國生活得如何?「好!」為人父親的感覺?「幾好!」生意及電影工作怎樣?「真係唔錯。」嘗試打爛沙盆問到篤,阿Mark誠心應接、表情十足,字字鏗鏘,但還是那句:「好、幾好、真係唔錯。」

幸運之男

聽完阿Mark這些年來的生活,真係吹佢唔脹,事實的確真係「好」、「幾好」同「真係唔錯」。馬來西亞的火鍋店生意,開完一間又一間,經濟狀況四平八穩,還有甚麼不好?戲癮發作,好劇本又自動送上,角色有發揮,還可以懶理票房及口碑,但片酬照收,幾好!近日更被荷里活睇中拍國際大片,又真係唔錯。

「好慶幸,在馬國的生意愈做愈好,生活清閒,同太太定期打高爾夫球,我鍾意熱天,又鍾意戶外活動、游水、潛水同打網球,我去加拿大探家人,凍一點都頂唔順。囡囡生得可愛健康,剛剛做老竇,感覺好好,我要去外地做事,唔可以唔帶太太同囡囡,離開太耐會心掛掛。早前去荷里活拍戲,一家三口過去,順便去埋加拿大探家人,日後都想囡囡在那裡讀書。馬國雖然好,但唔公平,華人只佔35%,無論在教育同政策上,政府都偏幫當地人。一個華人同一個馬拉人去爭一個學位,即使華人的成績好點,最後讀呢個學位一定係馬拉人。」

學識變通

雖然有感馬國欠公平,但講到生活質素,鄭浩南仍然覺得比香港好得多。「香港地少人多,稠密得難以呼吸,我好滿意依家呢種生活。只要踏入娛樂圈,好難完全抽離,行行下都會走番入去。身為電影人,見到香港電影沒落,似乎係步日本、台灣後塵,高峰時期冇精益求精,連最基本的水準都唔去保持,爛片多,觀眾唔係傻,呃得十次八次都唔會再上當。近年香港電影來來去去都係那幾個導演、演員扛飛。老實講,問我點挽救市道,我覺得冇事可以做。」

話雖如此,鄭浩南認為香港人,紿終最懂變通的。「香港目前有一個優勢,就係比其他地方的人靈敏快手。我在馬國請一個夥計,教基本功都教到嘔血,香港節奏快,人們學的快,跟唔上就冇得撈,日子有功,幾乎每個香港人都特別醒過人。如果香港政府可以配合多點,我相信電影業一定比依家好,但要重現昔日輝煌歲月,咁就好難。」

後記:今天有點煩

怕煩,所以冇野心。「在呢行見得太多,要呢樣要那樣,最終只會煩到自己。」怕煩,所以跑到寧靜的馬國生活。「哈!都唔係阿,為娶老婆啦!」甚麼都怕煩,最唔怕係小朋友。「男仔外向,我希望生多個女。話就話想帶個女去加拿大讀書,但那邊的細路仔都好壞……依家上網又好容易畀人呃……最怕佢將來……」一個怕煩的人,講起子女,囉嗦得……令人吃驚,冇計!為人父,逍遙自在,但談女即喪。
http://the-sun.orisun.com/channels/fea/20060512/20060511234203_0000.html

20060512_orisun_01.jpg
雖然喜歡過悠閒的生活,但鄭浩南仍有不少片約飄埋身。

20060512_orisun_02.jpg
鄭浩南愛事業、愛家庭,享往優悠的生活節奏,樂於享受人生。

20060512_orisun_03.jpg
鄭浩南身為演員,卻感到未能為電影界做甚麼。

20060512_orisun_04.jpg

arrow
arrow
    全站熱搜

    markcheng 發表在 痞客邦 留言(0) 人氣()